Dezasete pinturas e dezanove esculturas conforman a exposición que o artista Jontxu Argibay dedica ás mulleres, unha homenaxe á figura feminina desde a admiración, o respecto e a beleza cos que o artista contempla e representa a muller.

 

As súas 17 pinturas inclúen, ademais do retrato da súa nai, figuras de actrices, poetas e intérpretes como Aida Tarrío, Cristina Castaño, Susana Sampedro, Rosalía Vila, Valeria Castro, Zendaya, Candela Peña ou Esperanza Mara.

​

As acuarelas parten de momentos compartidos por estas mulleres nas súas redes sociais, imaxes que Jontxu Argibay reinterpreta e transforma en pezas artísticas. Os óleos, pola súa banda, céntranse en amigas e mulleres da súa contorna, construíndo a través delas unha particular mitoloxía feminina, íntima e persoal.

​

En canto ás esculturas, o artista explora diferentes oficios e representacións de sentimentos a través da forma, o volume e o corpo feminino, converténdoos nunha nova linguaxe de expresión.

​

Jontxu Argibay Sampedro (Ribeira, 1976) especializouse en Escultura na Escola de Artes Aplicadas Mestre Mateo de Santiago de Compostela e formouse en Ilustración na Escola Pablo Picasso da Coruña.

​

O seu prestixio na comarca do Barbanza vén avalado por numerosas esculturas públicas, en bronce e madeira. Cun amplo percorrido en exposicións individuais e colectivas, a súa obra como retratista e escultor de estudo, traspasou fronteiras ata chegar a salas de Nova York. Actualmente combina a escultura coa pintura ao óleo e a acuarela.